МЕКТЕП БАҒДАРЛАМАСЫНДА ҰЛТТЫҚ ДӘСТҮРДІ ОҚЫТУ ҚАЖЕТ ПЕ?

Қазақ қоғамында өскелең ұрпаққа ұлттық сананы қалыптастыру мәселесін өз салт-дәстүрін оқыту арқылы жүзеге асыру көтерілгенмен оқыту үрдісінде жүзеге асуы аздық етеді. Себебі, білім стандартында Кеңес үкіметі кезіндегі жазылған оқулықтар аударма арқылы қолданылып келді.Тәуелсіздік алғанмен, 20-25 жыл сол үрдістен шыға алмадық. Бірақ қазіргі кезде жаңартылған білім мазмұнына сай стандарт өзгертілгенмен қазақстандық контент айқын көрініс таппай отыр. Кембридж бағдарламасы бойынша жасалынған стандарт тағы да дәстүрлі оқытуды қажет емес деп тапты. Білім беру ордасының басшысы ретінде осы тақырыпты жан-жақты зерттей келе, дамыған елдердің білім саласында ұлттық құндылықтары қалай оқытылады деген ой болды. Сол мақсатта Швейцария, Финляндия, Жапония, Англия мемлекеттерінің білім жүйесін зерделеп, Швейцария мен Финляндияға іс-сапармен барып, іс-тәжірибе алмасуға мүмкіндік болды. Зерттеу барысында көкейімдегі сұрақтарға жауап алдым: Әр ұлтты ерекшелейтін салт - дәстүрі бар, басқа елдер өз дәстүрлерін оқытуды қалай қолдануда? Қандай формада оқытылуы қажет? Олар мектеп бағдарламасымен қалай ұштасқан? Қай жастан бастап ұлттық дәстүрді бала бойына сіңіру керек? Арнайы оқулық пен жұмыс дәптері, оқу бағдарламасы қажет пе? Қазақ ұлтының көне дәстүрлерін қазіргі жаңарту бағдарламасына сай қалай сұрыптап енгізуге болады? Осы сұрақтардың толық жауабын іс-тәжірибе алмасуда басшылыкка ала отырып, бағытым мен ойымның дұрыстығына көзім жетті. Дарынды балаларға арналған «ZEREK» мектебінің бағдарламасы осы ойдан туындап, бағдарлама жазылды, кәсіби мамандар, үздік ұстаздар таңдалды. Нұр-Сұлтан қаласы Білім басқармасының 2019 жылғы 27 тамыздағы сараптама кеңесінің №2 хаттамасы негізінде білімдік бастамаларды тиімді пайдалану және білім мазмұнын жаңарту мақсатында 03.09.2019 жылғы №518 бұйрығымен №53 мектеп-лицейінде «ZEREK» дарынды балалар мектебі эксперименттік алаңы ашылды. Бағдарламаның мақсаты: Қазақстанның өзіндік білім беру моделін қалыптастырып, әлемдік білім жүйесіне бәсекелесуге түсе алатын білімді, дарынды, іскер, өздік ойлау жүйесі дамыған, адамгершілігі жоғары, қабілетті тұлға қалыптастыру. Осы эксперименттік оқыту алаңына арнап «Ұлттық тағылым» атты оқыту кешені (оқулық, арнайы жұмыс дәптерімен бірге) жазылды. Оны жазуға мектебіміздің тәжірибелі бастауыш сынып ұстаздарынан шығармашылық топ құрылып, бағдарламасы жасалды. Көмекке Еуразия Ұлттық Университеті профессор, ғалым ұстаздары тартылды. Бағдарламасы бүгінгі күні қалалық, республикалық ғылыми-әдістемелік сараптама кеңесінде мақұлданып, бекітілген. Нәтижесінде бала жасы ескерілген, жеңіл құрылған тамаша оқулық пен жұмыс дәптері дайын болды. Авторлық бағдарлама ретінде қалалық та, Алматы қаласында өткен республикалық та «Үздік авторлық бағдарлама» конкурсынан жүлделі І орынға ие болды. Қазіргі таңда «ZEREK» мектебі эксперименттік алаңының оқушылары 3-сыныпты аяқтап отыр. Үш жыл ішінде бұқаралық ақпарат құралдарында таралып, түрлі байқауларда шәкірттері жүлделі орындарға ие болды. Олардың барлығы бірдей домбыра тартады, ұлттық салт-дәстүрге қанық, озық ойлы. Ең маңыздысы, дәстүрін білетін, үлкенді сыйлайтын нағыз ұлтжанды оқушылардың өсіп келе жатқанын көргенде - тағы да дұрыс бағытта екендігімізге сенім арта түсті. Мақсатымыз - алдымен, мектеп ішінде өзіміз тәжірибеден өткізіп, үш жылғы тәжірибені қорытындылай отырып, тәжірибені қала мектептеріне тарату. Егер қолдау тапса, болашақта республика көлемінде қазақстандық өзіндік білім беру жүйесі қалыптасатынына, ұлттық құндылыққа толы білім мектебінің саны артатынына үмітім мол.